தமிழில் செய்திகள்

துபாய்: ஐ.சி.சி., டெஸ்ட் வீரர்களுக்கான ரேங்கிங் (தரவரிசை) பட்டியலில் இந்தியாவின் சச்சின், ஜாகிர் உள்ளிட்டோர் முன்னேற்றம் கண்டுள்ளனர்.

சர்வதேச கிரிக்கெட் கவுன்சில் (ஐ.சி.சி.,), டெஸ்ட் வீரர்களுக்கான ரேங்கிங் (தரவரிசை) பட்டியலை துபாயில் நேற்று வெளியிட்டது. இதில் பேட்ஸ்மேன்களுக்கான ரேங்கிங்கில் மாஸ்டர் பேட்ஸ்மேன் சச்சின், நான்கு இடங்கள் முன்னேறி, 9வது இடம் பிடித்தார். வங்கதேச டெஸ்ட் தொடரில் அபார ஆட்டத்தை வெளிப்படுத்தியதே இம்முன்னேற்றத்துக்கு காரணம். இதன்மூலம் கடந்த டிச., 2005க்கு பின், தற்போது "டாப்-10' வரிசையில் மீண்டும் இடம் பிடித்துள்ளார். இதேபோல டிராவிட் நான்கு இடங்கள் முன்னேறி 15வது இடம் பிடித்தார். காம்பிர் முதலிடம், சேவக் 6வது இடத்தில் நீடிக்கின்றனர்.

ஜாகிர் எழுச்சி: வங்கதேச தொடரில் வேகத்தில் மிரட்டிய இந்தியாவின் ஜாகிர் கான், பவுலர்களுக்கான ரேங்கிங்கில் ஐந்து இடங்கள் முன்னேறி, 6வது இடம் பிடித்தார். ஹர்பஜன் சிங் 8வது இடத்துக்கு தள்ளப்பட்டார்.

இந்தியா "நம்பர்-1': டெஸ்ட் அணிகளுக்கான ரேங்கிங் பட்டியலில் இந்திய அணி 125 புள்ளிகளுடன் தொடர்ந்து முதலிடம் வகிக்கிறது. தென் ஆப்ரிக்க அணி (120 புள்ளி) 2வது இடத்தில் தொடர்கிறது.