தமிழில் செய்திகள்

கொழும்பு: கொழும்பு டெஸ்டில் சச்சின் சதம் அடிக்க, இந்திய அணி எழுச்சி கண்டது. சுரேஷ் ரெய்னாவும் பொறுப்பாக ஆடி நம்பிக்கை அளித்தார். இலங்கை அணியின் பந்துவீச்சு எதிர்பார்த்த அளவுக்கு அமையவில்லை.

இலங்கை சென்றுள்ள இந்திய அணி, 3 போட்டிகள் கொண்ட டெஸ்ட் தொடரில் விளையாடுகிறது. முதல் டெஸ்டில் இலங்கை வென்றது. இரண்டாவது டெஸ்ட் கொழும்புவில் உள்ள எஸ்.எஸ்.சி., மைதானத்தில் நடக்கிறது.
முதல் இன்னிங்சில் இலங்கை அணி 4 விக்கெட்டுக்கு 642 ரன்கள் எடுத்து "டிக்ளேர்' செய்தது. பின் முதல் இன்னிங்சை துவக்கிய இந்திய அணி, 2ம் நாள் ஆட்டநேர முடிவில் விக்கெட் இழப்பின்றி 95 ரன்கள் எடுத்திருந்தது.

நழுவிய சதம்:நேற்று 3ம் நாள் ஆட்டம் நடந்தது. சேவக், முரளிவிஜய் ஜோடி பொறுப்பான ஆட்டத்தை தொடர்ந்தது. நிதானமாக ஆடிய முரளிவிஜய், டெஸ்ட் அரங்கில் தனது 2வது அரைசதமடித்தார். இந்த ஜோடி முதல் விக்கெட்டுக்கு 165 ரன்கள் சேர்த்த போது, ரந்திவ் சுழலில் "ஸ்டெம்பிங்' ஆன சேவக் (99), சதமடிக்கும் வாய்ப்பை நூலிழையில் தவறவிட்டார். முரளிவிஜய், 58 ரன்களுக்கு வெளியேறினார்.

அனுபவம் ஏமாற்றம்:அடுத்து வந்த அனுபவ வீரர் டிராவிட் (3), ரந்திவ் சுழலில் எல்.பி.டபிள்யு., முறையில் வெளியேறி ஏமாற்றினார். பின்னர் இணைந்த சச்சின், லட்சுமண் ஜோடி நிதானமாக ரன் சேர்த்தது. இந்த ஜோடி 4வது விக்கெட்டுக்கு 68 ரன் சேர்த்த போது, மெண்டிஸ் சுழலில் எல்.பி.டபிள்யு., முறையில் லட்சுமண் (29) அவுட்டானார்.

சச்சின் அபாரம்:பின்னர் சுரேஷ் ரெய்னாவுடன் இணைந்த சச்சின், அபார ஆட்டத்தை வெளிப்படுத்தினார். இலங்கை பந்துவீச்சை எளிதாக சமாளித்த இவர், டெஸ்ட் அரங்கில் தனது 48வது சதமடித்து தூள் கிளப்பினார். இவருக்கு ஒத்துழைப்பு தந்த ரெய்னா, தனது முதல் டெஸ்டில், முதல் அரைசதமடித்து அசத்தினார்.
மூன்றாம் நாள் ஆட்டநேர முடிவில் இந்திய அணி, 4 விக்கெட்டுக்கு 382 ரன்கள் எடுத்து, 260 ரன்கள் பின்தங்கி இருந்தது. சச்சின் (108), ரெய்னா (66) அவுட்டாகாமல் இருந்தனர்.
இலங்கை சார்பில் ரந்திவ், மெண்டிஸ் தலா 2 விக்கெட் வீழ்த்தினர்.

சச்சின் "48'
இலங்கை அணிக்கு எதிரான நேற்றைய 3ம் நாள் ஆட்டத்தில், அபார ஆட்டத்தை வெளிப்படுத்திய இந்திய மாஸ்டர் பேட்ஸ்மேன் சச்சின், டெஸ்ட் அரங்கில் தனது 48வது சதமடித்து அசத்தினார். இது இலங்கை அணிக்கு எதிராக இவர் அடித்த 9வது சதம். தவிர, கொழும்பு எஸ்.எஸ்.சி., மைதானத்தில் இவர் அடித்த 2வது சதம். முன்னதாக இங்கு கடந்த 1999ல் சதமடித்தார். சுமார் 11 ஆண்டுக்கு பின் மீண்டும் இங்கு சதமடித்து சாதித்துள்ளார்.
* இதுவரை 168 டெஸ்ட் போட்டியில் பங்கேற்று 48 சதம், 55 அரைசதம் உட்பட 13647 ரன்கள் எடுத்துள்ளார். இதன்மூலம் டெஸ்ட் அரங்கில், அதிக போட்டியில் விளையாடிய வீரர்கள் வரிசையில், ஆஸ்திரேலியாவின் ஸ்டீவ் வாக் சாதனையை சமன் செய்தார் சச்சின். இருவரும் தலா 168 டெஸ்ட் போட்டியில் விளையாடி உள்ளனர்.

தேவை 61 ரன்கள்
முதல் இன்னிங்சில் 241 ரன்களுக்கு 4 விக்கெட்டை இழந்த இந்திய அணி, "பாலோ-ஆனை' தவிர்க்குமா என்ற இக்கட்டான நிலையில் இருந்தது. பின் சச்சின், ரெய்னா ஜோடி, பொறுப்பான ஆட்டத்தை வெளிப்படுத்தி, 3ம் நாள் ஆட்டநேர முடிவில் 4 விக்கெட்டுக்கு 382 ரன்களுக்கு கொண்டு சென்றது. இன்னும் 61 ரன்கள் எடுத்தால், "பாலோ-ஆனை' எளிதில் தவிர்க்கலாம்.

தவறான "ஷாட்': சேவக்
சேவக் கூறுகையில், ""ஒரு ரன்னில் சதமடிக்கும் வாய்ப்பை இழந்தது வருத்தம் அளிக்கிறது. இதற்கு எனது தவறான "ஷாட்' முக்கிய காரணம். முதல் இன்னிங்சில் சச்சின், லட்சுமண் சதமடிப்பார்கள் என நினைத்தேன். ஆனால் துரதிருஷ்டவசமாக லட்சுமண் விரைவில் அவுட்டானது ஏமாற்றம் அளிக்கிறது. இன்றைய 4ம் நாள் ஆட்டத்தில் இந்திய "மிடில்-ஆர்டர்' பேட்ஸ்மேன்கள் கைகொடுப்பார்கள்,'' என்றார்.

மெண்டிசை சமாளிப்பது எளிது
சச்சின் கூறுகையில்,"" கடந்த முறை மெண்டிஸ் சுழலில், இந்திய வீரர்கள் திணறினர். இம்முறை எளிதாக சமாளித்து விட்டனர். ரந்திவும் சுழலில் சிறப்பாக செயல்படுகிறார். இவர்கள், முரளிதரன் இடத்தை நிரப்புவது கடினம். இதற்கு கடுமையாக போராட வேண்டும்,'' என்றார்.

ஸ்கோர் போர்டு

முதல் இன்னிங்ஸ்

இலங்கை 642/4 ("டிக்ளேர்')

இந்தியா
முரளிவிஜய் எல்.பி.டபிள்யு.,(ப)மெண்டிஸ் 58(124)
சேவக் (ஸ்டெம்)பிரசன்னா (ப)ரந்திவ் 99(101)
டிராவிட் எல்.பி.டபிள்யு.,(ப)ரந்திவ் 3(18)
சச்சின் -அவுட் இல்லை- 108(181)
லட்சுமண் எல்.பி.டபிள்யு.,(ப)மெண்டிஸ் 29(98)
ரெய்னா -அவுட் இல்லை- 66(133)
உதிரிகள் 19
மொத்தம் (108 ஓவரில், 4 விக்.,) 382
விக்கெட் வீழ்ச்சி: 1-165(சேவக்), 2-169(முரளிவிஜய்), 3-173(டிராவிட்), 4-241(லட்சுமண்).
பந்து வீச்சு: பிரசாத் 10-0-53-0, பெர்ணான்டோ 21-0-83-0, மாத்யூஸ் 9-1-24-0, ரந்திவ் 35-11-108-2, மெண்டிஸ் 26-2-92-2, தில்ஷன் 7-1-16-0.